ليه محمد وأحمد بيشربوا بانجو؟؟

من يومين كنت راكبة في الكرسي اللي ورا السواق بالظبط،، وكان قاعد جنبه صاحبه..

وأنا في نص الطريق التفتت لحديثهم الشيق جدًا والجذاب الذي دفعني دفعًا لأن أتطفل عليهم وأستمع إليه..

طبعًا الأسلوب كان منحدر جدًا،، والصوت كما اللمبي في عز سطلته..

الحوار الذي التقطت طرفه كان كالتالي:

محمد: عارف ياض يا احمد، البانجو اللي جابه الواد سيكا بصراحة عمري ما شربت ولا هشرب زيه، قلقاس قلقاس يعني (مش واخده بالي من وجه الشبه بين البانجو والقلقاس)!!

أحمد: الواد سيكا بصراحة عليه ورقة بانجو محصلتش، بس أنا مش عارف هو ليه مبقاش يجيب حشيش (صعب عليا بصراحة)!!

محمد: لا يا عم حشيش إيه؟ دا شح م السوق، خلينا في البانجو أحسن...

طبعًا كانت فيه سيجاره في إيده، وأنا كنت رايحة الامتحان..

كلامهم دفعني دفعًا لأن أسد كل منافذ جهازي التنفسي، وربنا يسترنا من الحشيش والبانجو!..

طبعًا الحوار دا كل الناس اللي راكبين معايا سمعوه؛ لأن صوتهم كان عالي جدًا...

أنا مش عارفة هما ليه بيتكلموا عن البانجو والحشيش كأنهم بيتكلموا على عصير فراولة..

هو الموضوع دا بقى مقبول جدًا، والحديث فيه مباح ولا مراء عليه؟!!

يعني هل أصبح الطبيعي إن كل الناس بتشرب حشيش وبانجو، ومن لا يفعل فهو شاذ عن القاعدة؟!!

السؤال الهام جدًا: ليه بقى محمد وأحمد وغيرهم بيشربوا بانجو وحشيش؟؟!!!

وأنا مش بتكلم بس على فئة سواقين الميكروباصات ومن شابههم..

أنا شايفه إن دي بقت ظاهرة منتشرة جدًا في مصر، من أول الطبقة الغنية مرورًا بالمتوسطة وانتهاءً بالفقيرة..

أصبح الإدمان أمر طبيعي ومقبول ومتاح في أماكن غير متوقع فيها مهازل كهذه أصلاً، كالجامعات والمدارس!!!

مش لازم يكون لينا كلنا دور إيجابي وفعَّال في الوقوف بوجه موجة السطل والدروخة والشم دي؟؟

عيني عليكِ يا بلــــــــــــــد!!! :(